ಚಿಕ್ಕೋಡಿ : ಇಲ್ಲಿಯ ಸೇಂಟ್ ಫ್ರಾನ್ಸಿಸ್ ಆಫ್ ಅಸ್ಸಿಸಿ ಶಾಲೆಯಲ್ಲಿ ಶನಿವಾರ ದಿನಾಂಕ 01/11/2025 ರಂದು ಸಾಯಂಕಾಲ ದೀಪಾವಳಿ ಹಾಗೂ 70ನೇ ಕನ್ನಡ ರಾಜ್ಯೋತ್ಸವವನ್ನು ಸಡಗರದಿಂದ ಆಚರಿಸಲಾಯಿತು. ವಿದ್ಯಾರ್ಥಿಗಳು ಹಾಗೂ ಎಲ್ಲರೂ ಸೇರಿ ನಾಡಗೀತೆ ಹಾಡುವ ಮೂಲಕ ಕಾರ್ಯಕ್ರಮಕ್ಕೆ ಚಾಲನೆ ನೀಡಲಾಯಿತು. ರಾಜಸ್ಥಾನದಿಂದ ಬಂದ ಸಮಾಜ ಸೇವಕಿಯರಾದ ಎಂಟು ಜನ ಸಿಸ್ಟರ್ಸಗಳು ಮತ್ತು ಶಾಲೆಯ ಪ್ರಾಂಶುಪಾಲರಾದ ಫಾದರ್ ಜೇಸನ್ ಫರ್ನಾಂಡಿಸ್ ಅವರು ಜ್ಯೋತಿ ಬೆಳಗಿಸುವುದರ ಮೂಲಕ ಕಾರ್ಯಕ್ರಮಕ್ಕೆ ವಿದ್ಯುಕ್ತ ಚಾಲನೆ ನೀಡಿದರು. ನಂತರ ಪ್ರಾರ್ಥನಾ ಗೀತೆಗೆ ವಿದ್ಯಾರ್ಥಿನಿಯರು ನೃತ್ಯ ಮಾಡಿದರು. ತದನಂತರ ಲಕ್ಷ್ಮೀ ದೇವಿಗೆ ಪೂಜೆಯನ್ನು ನೆರವೇರಿಸಲಾಯಿತು. ಕಾರ್ಯಕ್ರಮಕ್ಕೆ ಮುಖ್ಯ ಅತಿಥಿಗಳಾಗಿ ಚಿಕ್ಕೋಡಿಯ ದಕ್ಷ ಹಾಗೂ ಪ್ರಾಮಾಣಿಕ DSP ಅಧಿಕಾರಿಗಳಾದ ಶ್ರೀ ಗೋಪಾಲಕೃಷ್ಣ ಗೌಡರ ಅವರು ಮತ್ತು ಶ್ರೀ ಬಸಗೌಡ ನೇರ್ಲಿ, PSI ಚಿಕ್ಕೋಡಿ ಅವರು ಆಗಮಿಸಿದ್ದರು. ಅಂದು ಬೆಳಿಗ್ಗೆ ಕರ್ನಾಟಕ ರಾಜ್ಯೋತ್ಸವ ದಿನಾಚರಣೆ ಸಮಿತಿ ಹಾಗೂ ತಾಲೂಕು ಆಡಳಿತ ಚಿಕ್ಕೋಡಿ, ಇವರು ರಾಜ್ಯೋತ್ಸವದ ಅಂಗವಾಗಿ ಹಮ್ಮಿಕೊಂಡ "ಸ್ತಬ್ಧ ಚಿತ್ರ" ಪ್ರದರ್ಶನದಲ್ಲಿ ನಮ್ಮ ಅಸ್ಸಿಸಿ ಶಾಲೆಯ ವತಿಯಿಂದ ನಮ್ಮ ನಾಡಹಬ್ಬ ದಸರೆಯ ವೈಭವವನ್ನು ಸಾರುವ "ಮೈಸೂರು ದಸರಾ ಸ್ತಬ್ಧ ಚಿತ್ರವು" ಪ್ರದರ್ಶನಗೊಂಡು ಪ್ರಥಮ ಬಹುಮಾನ ಪಡೆದಿದ್ದು, ಆ ಬಹುಮಾನವನ್ನು ಮತ್ತು ಕಲಾಭಾರತಿ ಚೈಲ್ಡ ಆರ್ಟ ಇನ್ಸ್ಟಿಟ್ಯೂಟ್, ಮಹಾರಾಷ್ಟ್ರ ಇವರು ಆಯೋಜಿಸಿದ್ದ 2025-26 ನೇ ಸಾಲಿನ ಚಿತ್ರಕಲೆ ಸ್ಪರ್ಧೆಯಲ್ಲಿ ಮೂರನೇ ತರಗತಿಯ ವಿದ್ಯಾರ್ಥಿ ಕುಮಾರ ಅಶಿತೋಷ ಹೊಳೆಪ್ಪನವರ ಈತನಿಗೆ ದೊರೆತ 25 ಗ್ರಾಂ. ಶುದ್ಧ ಬೆಳ್ಳಿಯ ಪದಕ ಹಾಗೂ ಪ್ರಶಸ್ತಿ ಪತ್ರವನ್ನು ವಿತರಿಸಿ, ಅಭಿನಂದಿಸಿದ ಮುಖ್ಯ ಅತಿಥಿಗಳಾದ ಶ್ರೀ ಗೋಪಾಲಕೃಷ್ಣ ಗೌಡರ, DSP ಚಿಕ್ಕೋಡಿ, ಅವರು ಮಾತನಾಡಿ ಚಿಕ್ಕೋಡಿಯ ಅಸ್ಸಿಸಿ ಶಾಲೆಯು ಉತ್ತಮವಾದ ಜ್ಞಾನವನ್ನು ನೀಡುತ್ತಿದ್ದು, ಇಲ್ಲಿಯ ವಿದ್ಯಾರ್ಥಿಗಳು ಜ್ಞಾನಿಗಳು ಹಾಗೂ ಪ್ರತಿಭಾವಂತರಾಗಿದ್ದಾರೆ. ಪಾಲಕರು ಶಿಕ್ಷಕರಿಗೆ ಮಕ್ಕಳ ಕಲಿಕೆಗೆ ಪೂರಕವಾದ ಸಹಕಾರವನ್ನು ಕೊಡಬೇಕು ಹಾಗೂ ವಿದ್ಯಾರ್ಥಿಗಳು ಇವತ್ತಿನ ಸ್ಪರ್ಧಾತ್ಮಕ ಯುಗದಲ್ಲಿಯೂ ಉತ್ತಮ ಮೌಲ್ಯಗಳೊಂದಿಗೆ ಉನ್ನತ ಸ್ಥಾನಕ್ಕೆ ಏರಬೇಕು ಎಂದು ಹೇಳಿದರು. ಬೆಳಕಿನ ಹಬ್ಬ ದೀಪಾವಳಿ ಹಬ್ಬದ ಇತಿಹಾಸಕ್ಕೆ ಸಂಬಂಧಿಸಿದಂತೆ ಹಾಗೂ ಕರ್ನಾಟಕ ರಾಜ್ಯೋತ್ಸವದ ಚರಿತ್ರೆಗೆ ಸಂಬಂಧಿಸಿದಂತೆ ನಾಡು-ನುಡಿಯ ಮಹಿಮೆಯನ್ನು ಬಿಂಬಿಸುವ ಹಾಡುಗಳಿಗೆ ವಿದ್ಯಾರ್ಥಿಗಳು ಕಣ್ಮನ ಸೆಳೆಯುವ ನೃತ್ಯಗಳನ್ನು ಪ್ರದರ್ಶಿಸಿದರು. ತದನಂತರ ಸಿಡಿಮದ್ದುಗಳ ಸಂಭ್ರಮದಲ್ಲಿ ಅಸ್ಸಿಸಿ ಶಾಲೆಯ ಎಲ್ಲ ವಿದ್ಯಾರ್ಥಿಗಳು ಅತ್ತ್ಯುತ್ಸಾಹದಿಂದ ಪಾಲ್ಗೊಂಡು ಪಟಾಕಿ ಸಿಡಿಸಿ ಸಂಭ್ರಮಿಸಿದರು. ಅಂದು ದೀಪಾವಳಿಯ ಅಂಗವಾಗಿ 1 ರಿಂದ 5 ನೇ ತರಗತಿಯ ವಿದ್ಯಾರ್ಥಿಗಳಿಗೆ ದೀಪಗಳ ಅಲಂಕಾರದ ಸ್ಪರ್ಧೆ ಹಾಗೂ 6 ರಿಂದ 10 ನೇ ತರಗತಿಯ ವಿದ್ಯಾರ್ಥಿಗಳಿಗೆ ರಂಗೋಲಿ ಸ್ಪರ್ಧೆಗಳನ್ನು ಏರ್ಪಡಿಸಲಾಗಿತ್ತು. ವಿದ್ಯಾರ್ಥಿಗಳು ಈ ಸ್ಪರ್ಧೆಯಲ್ಲಿ ಭಾಗವಹಿಸಿ ದೀಪಗಳನ್ನು ಅಲಂಕರಿಸಿ, ಮನಸೆಳೆಯುವ ಸುಂದರ ರಂಗೋಲಿ ಚಿತ್ರಗಳನ್ನು ಅರಳಿಸಿದ್ದರು. ಅಸ್ಸಿಸಿಯ ಮಹಾದ್ವಾರದ ಬಳಿಯ ದಾರಿಯು ಬಣ್ಣ ಬಣ್ಣದ ರಂಗೋಲಿಯ ಚಿತ್ರಗಳಿಂದ ಹಾಗೂ ಸಭಾ ಭವನವು ದೀಪಗಳ ಅಲಂಕಾರದಿಂದ ಶೃಂಗಾರಗೊಂಡಿತ್ತು. ಒಟ್ಟಿನಲ್ಲಿ ಅಂದು ಅಸ್ಸಿಸಿ ಶಾಲೆಯ ಪ್ರಾಂಗಣವು ದೀಪಗಳ ಬೆಳಕಿನಲ್ಲಿ ಹಾಗೂ ವಿದ್ಯಾರ್ಥಿಗಳ ಕೈಚಳಕದಿಂದ ಮೂಡಿಬಂದ ರಂಗೋಲಿಯ ಚಿತ್ತಾರಗಳಿಂದ ಕಂಗೊಳಿಸುತ್ತಿತ್ತು. ಶಾಲೆಯ ಪ್ರಾಂಶುಪಾಲರಾದ ಫಾದರ್ ಜೇಸನ್ ಫರ್ನಾಂಡೀಸ್ ಹಾಗೂ ಉಪ ಪ್ರಾಂಶುಪಾಲರಾದ ಫಾದರ್ ಸ್ಟೆನಿಸ್ ಲೋಪಿಸ್ ಹಾಗೂ ಚಿಕ್ಕೋಡಿಯ ವಿಮುಕ್ತಿ ಸಮಾಜ ಸೇವಾ ಸಂಸ್ಥೆಯ ನಿರ್ದೇಶಕರಾದ ಫಾದರ್ ವಿನ್ಸೆಂಟ್ ಡಿಸೋಜ ಮತ್ತು ಶಾಲೆಯ ಎಲ್ಲ ಶಿಕ್ಷಕ-ಸಿಬ್ಬಂದಿ ವರ್ಗ, ವಿದ್ಯಾರ್ಥಿಗಳು, ಪಾಲಕರು ಉಪಸ್ಥಿತರಿದ್ದರು.